《蘋果日報與小巴佬》
尋日有唔少人都買蘋果日報去撐，仲有唔少人話要買股票撐佢，我已經好少講時事，但今次我想用一件真人真事去講呢件事。
有一次我Call Van，上車既時候，司機一聲抱怨話自己今日當黑，幫客提貨墊支咗幾百蚊，然後個客無影，唔知收唔收得返錢，仲去咗備案。
我心諗，其實好小事姐，墊出嚟個客總要拎返嘅，為幾百蚊而呃真係好小見，反而咁就去備案咪仲麻煩。行行吓佢電話響，我聽應該係佢老婆打嚟問佢幾時返屋企食飯，佢話今日搞左成日無搵到錢仲要貼錢，佢走多幾轉先返，唔好等佢食飯咁，跟住佢仲特登問我係咪落現金單。
作為一個睇過全套柯南同金田一嘅中年宅男，明顯佢真係無錢開飯，咁啱我搬完野仲要去另一個地方，咁我就同司機講，我一陣仲要去第二度，你等我搬少少野，五分鐘左右你再接多我一程啦。
佢即時話無問題，有錢搵點都等。
我心諗，其實我都可以搭巴士嘅，但我唔志在呢幾十蚊，但對於佢嚟講，呢幾十蚊係今日嘅佢唔止係幾十蚊價值，仲帶有一份溫暖。
正當我覺得自己做咗件好事之時，司機突然同我講，呃，我記得你樓下就有車去個度，仲好快到添，嗱，唔係話我唔想賺你錢，但呢幾十蚊真係無謂浪費嘛。
我當然知樓下有車啦，我住呢度點會唔知……然後我仲要扮唔識，話我唔知個車站係邊喎，我唔係住呢頭咁。
點知佢仲話比我聽點行，係咩位置，仲話一陣指比我睇……
佢臨到之前，似係自言自語咁講：「啊，有錢都唔賺，係唔係好戇居啊？」
我答上口：「唔係啊，我覺得咁幾好啊。」
最後我落車，車費七十五，我比左一百佢唔駛找，呢度佢無拖拉，講咗句「多謝」，一句好有份量嘅「多謝」。
作為一個，睇藍色窗簾都會特別多睇法嘅人，我有幾點想分享比大家。
每個人都總有困難嘅時候，唔一定係工作整體，而係某一日特別黑嘅幾個鐘頭，佢需要大家幫忙，你，同我，都有日有呢個機會。
有閒錢嘅我哋，要幫一個自己能力範圍內嘅錢，真係只需要一個理由，或者呢個理由好傻好唔合理，但初心講，我哋係想幫人。
司機佢有錢唔賺，係站係我角度去諗，你唔需要我嘅專業，又或者你唔需要咁多，不如正正經經咁花錢係佢哋嘅專業上面，因為揸車先係佢長久生活嘅本業，你一張慷慨單，一次苦情，只不過係一時解決，正所謂，長貧難顧。
但你仍然可以坦白地講出，我見你今日有少少唔順，呢筆貼士，希望你可以渡過難關，同樣，佢唔單止係一筆錢，仲係我對你嘅一聲加油。
最後，對於一個司機，佢最重要係有一個健全嘅市場，唔會比一時唔好彩，一個失誤，而無咗份工，失去長久收入。
Search